home | index | concordance | composite list of variants | help |
To Mr. George Herbert, with one of my
Seal, of the Anchor and Christ.
Qvi prius assuetus Serpentum fasce Tabellas
Signare, (hæc nostræ symbola parva Domus)
Adscitus domui Domini, patrioque relicto
Stemmate, nanciscor stemmata jure nova.
Hinc mihi Crux primo quæ fronte impressa lavacro,
Finibus extensis, anchora facta patet.
Anchoræ in effigiem, Crux tandem desinit ipsam,
Anchora fit tandem Crux tolerata diu.
Hoc tamen ut fiat, Christo vegetatur ab ipso
Crux, & ab Affixo, est Anchora facta, Jesu.
Nec Natalitiis penitus serpentibus orbor,
Non ita dat Deus, ut auferat ante data.
Qua sapiens, Dos est; Qua terram lambit & ambit,
Pestis; At in nostra fit Medicina Cruce,
Serpens; fixa Cruci si sit Natura; Crucique
A fixo, nobis, Gratia tota fluat.
Omnia cum Crux sint, Crux Anchora fixa, sigillum
Non tam dicendum hoc, quam Catechismus erit.
Mitto, nec exigua, exigua sub imagine, dona,
Pignora amicitiæ, & munera; Vota, preces.
Plura tibi accumulet, sanctus cognominis, Ille
Regia qui flavo Dona sigillat Equo.